باش بەت>شېئىر

نەپەس تەلقىنلىرى

يوللانغان ۋاقىت:2016-06-29 18:56:00 مەنبە:«قەشقەر» ژۇرنىلى مۇھەررىر:زۇلخۇمار تۇردى

 

 

ئەسقەر ھاجى ئابدۇللا

 

1

 

نىگاھ بولۇپ ئاققاندا شەرتىڭ،

نېچۈن پىنھان تۇتتۇڭ ئۆزۈڭنى.

بار ئىكەنغۇ ئالەمچە پەرقىڭ،

سەزمەپتىمەن ئەقىل كۆزۈڭنى.

زامانلارنى سىغدۇرسا قەلبىڭ،

دېمىدىم بىر كۆرەي يۈزۈڭنى.

ئۆچمەس ئىدى ئاتىغان بەختىڭ،

ئاڭلىسام ھەي، شىڭگىل سۆزۈڭنى.

 

2

 

تىنىقلىرىم قوشۇلسا قارغا،

تەركىبلىرى ئۆزگەرمەس بەلكىم.

ھارارىتى ئايلانسا پارغا،

ئېقىنلىرى بېغىمغا تەقدىم.

خۇشپۇراقى مەنسۇپ نىگارغا،

سۆيگۈ تەنھا، بولمايدۇ تەقسىم.

كۆيگەن بىلەن ئايدەك چىرايغا،

ئېرىشەلمەس ۋىسالغا ھەر كىم.

 

3

 

مۇئەتتەرنى ئىزدىسەم، پىراق:

كەتتى چۆلگە دەيدۇ يېگانە.

ئەسلىمەمدە كۆرۈنمەس يىراق،

كىچىكىمدە بارغان پىيادە.

خىياباندا كۆرۈنمەس قىياق،

سوراي دېسەم ياردىن نىشانە.

بولاي دەيمەن چۆچەككە سىناق،

ئەجەب ئەمەس پۈتسە ھېكايە.

 

4

 

تەلەتىڭگە يۈرەكنى ئاتسام،

دېرىزەڭنى ئاچسا ئامالىم.

كەزمەس ئىدى پىراقنى ئاخشام،

ئاينى ھاپاش قىلىپ خىيالىم.

نۇرى ئىستەك باھارنى چاتسام،

قىلسا مەپتۇن سېنى سىياقىم.

يەتسە ئەگەر ئۇپۇققا ناخشام،

شاماللارغا سوۋغات مۇرادىم.

 

5

 

سۆيۈلۈشنى ئىزدەيدۇ سەپەر،

ئېلىپ كەلدى قۇياش ناھارنى.

كۆچۈپ كەپتۇ ۋاپا تاڭ سەھەر،

تېرىش ئۈچۈن باغقا باھارنى.

ئالسا مەيلى جاننى جانجىگەر،

قىينىمىسۇن ئاشىق چاكارنى.

قۇچاقلىسا رىۋايەت ئەگەر،

ساداقەتتىن ياساي مۇنارنى.

 

6

 

بەرگىن گۈلۈم دىدار، ناشتىغا،

بايرام قىلاي بەرگىنى سۆيۈپ.

ھەۋىسىم يوق سازدىن باشقىغا،

چالاي مودا پەدىنى تۈزۈپ.

 

تەشنالىقىم قېنىپ ناخشىغا،

ئالسۇن ئارام چېھرىڭنى كۆرۈپ.

يۈرىكىمنى ئالاي دالدىغا،

ئوينىمىسۇن ئۆزگىلەر ئۈزۈپ.

 

7

 

بۇ ئەلدە بىر ئادەت بار غەلەت،

لەھەتلەرگە بېھىش ھاۋالە.

ئاخىرەتتىن ئىزدەيدۇ مەدەت،

قاباھەتنى تىلەپ ئاۋارە.

بىلىمسىزنىڭ ساۋابى قەھەت،

ئۈنۈپ چىقماس روھىدىن لالە.

كۆز يېشىڭنى تۇيامدۇ جەسەت،

قىلمىشىڭنى توختات بىچارە.

 

8

 

ياساتقىنىم ئۆمۈرلۈك خانە،

روھىمنى خار قىلمايدۇ پەقەت.

بولسىمۇ تەن تېرىقتەك دانە،

ئۇلۇغلايدۇ مېنى ئەل، جەمەت.

چارچىماسمەن ئەمدى زىيادە،

ھاياتلىقتىن ئىزدەپ نۇر، سەھەت.

يوقلاپ تۇرار پۈتكەن رىسالە،

زىننەت بولۇپ قەبرەمگە ئەبەد.

 

9

 

ئەقىدەمدىن خەندان ئەيلىگەن،

گۇلزارلىقىم كەتكەندۇ قايان؟

لەززىتىنى ئاران پەرلىگەن،

كۆچەتلەرگە سىرلىرىم ئايان.

 

«چىدىمايمەن ئەمدى كەل» دېگەن،

سۆيگۈ رايى تۇغدى ھاياجان.

جىلۋىسىنى قۇياش رەڭلىگەن،

ھەرەمباغلار مەن سۆيگەن جاھان.

 

10

 

دىلغا چۆككەن ئۆچمەس نۇر قەلەم،

كەچمىشىمنى بۆلدى نەچچىگە.

بولسام جۇدا ۋەسلىڭدىن سەنەم،

پىراقىم زار كىمنىڭ رەھمىگە.

 

رىزالىقنى بەردى دەرد - ئەلەم،

تاپسام شىپا نىھان زەخمىگە.

قەلەندەر دەپ قويدى شاھ لەقەم،

ئەل سالامى ياغدى رەستىگە.

 

11

 

سۈرىتىڭنى ئاسقان مەرىكە،

پۇشايماندىن چەكتى ئىزتىراپ.

تەلەتىڭدە مۇزلاپ ئەقىدە،

ئۈمىدلەرنى كەتتى ئوغۇرلاپ.

قوزغالدى ئاھ، قىرغاقتىن كېمە،

پالۇبىغا بېسىپ لىق كىتاب.

ساۋاقلارنى قىلدى ھەدىيە،

ئىشەنچىمگە بەرگەن شۇ جاۋاب.

ۋەتىنىمدۇر مەككە-مەدىنە،

قىلاي دىلدىن كۈندە مىڭ تاۋاپ.

 

12

 

تومۇرۇمدا بىر دېڭىز شەربەت،

ئاقار بېغىڭ تامان ئۆركەشلەپ.

گۈل بەرگىدە ئالەمچە ھەسرەت،

رايى بولغاچ رىياغا دەسلەپ.

ئەيلىدى خار تېنىڭگە غەپلەت،

قالدىڭمۇ شۇ چاغلارنى ئەسلەپ.

ئەسلىمەڭدە قالدۇرۇپ ئەخلەت،

بەدىلىڭدىن تاپتى كىم مەنسەپ.

ئويلىغاچقا ئاسان دەپ لەززەت،

قۇرۇۋالدىڭ ساۋاقتىن مەكتەپ،

 

13

 

كۆڭلۈم چاپار باياۋاندا ئات،

تىڭشاپ باقسام يۈرەك تىۋىشسىز.

سۈكۈتلەر تام سوقتى نەچچە قات،

ئىچىدە ئوت كۆيەر تىنىمسىز.

رىشتىمنى يار ۋىسالىڭغا چات،

ئاڭلىنار يات كۈيلەر يېقىمسىز.

سەۋرەمنى جان قەبرىلەرگە سات،

پۇراقىڭنى سەزمىسۇن ھەرگىز.

ئەيلىمە كۆز يۇمۇلسا پەرياد،

سۆيگۈ پەيدا بولماس چېقىنسىز.

 

چاقنايدۇ ھايات

 

سەن ئۈچۈن تۇغۇلغان خىيالىم ياغار،

بۇلۇتلار كۆكسىدىن ئايلىنىپ ياشقا.

ھەر نەپەس ئەركىدىن مۇرادىم تامار،

كىم بىلۇر تەمىنى سېنىڭدىن باشقا.

 

تۈن كۆرەك كۆزۈمدە ماڭا قول سۇنغان،

باغلىرىم سامادا چاقنايدۇ ھايات.

ئېزىتقۇ كوچىلار گويا جانقورغان،

سەيلىگە خىيالدىن تىلىدىم قانات.

 

لېۋىمگە بوي سوزۇپ تۇرغان ھىلال ئاي،

سورىماس ھېچنېمە مەيلىمدىن پەقەت.

ئىزلىرىم قۇرىماي تۇرغان جىلغا، ساي،

يىلاندەك تولغىنىپ تىلەيدۇ مەدەت.

 

خارامۇش خىيالنى يورۇتقان قۇياش،

قۇم باسقان چۈشۈمدىن ئويغاتتى سەھەر.

كەلگۈسى كۆمۈلگەن سەپەردە سەپداش،

دەيدۇ: «مەن تۇلپىرىڭ مەنزىلگە قەدەر».

 

سېنىڭ نەزمەڭ

 

شېئىرىڭنى ئوقۇدۇم، تۇغۇلدى شېئىر،

روھىڭدىن تامغىنى مېنىڭ ئىجادىم.

ئوخشايدۇ نېمانچە دېسەم بۇ قەسىر،

ئىكەنغۇ يازغىنىڭ ئارزۇ - مۇرادىم.

 

بىر بېيىت ۋەزنىدە ئالەمچە ئىلھام،

كىرەلمەس يۈرەككە غەيرىي غەم، ھەشەم.

ساقايسۇن دېسەڭ يار دىدارىڭ ئىنئام،

كار قىلماس باشقىلار ياسىغان مەلھەم.

 

قەلەمدىن بالقىغان نۇرلار چايقىلار،

ھاياجان ئۆركىشى ياساپ تومۇردا.

جېنىمدىن ھالقىغان سۆيگۈ ساقلىنار،

ۋاپا قوش يۈرەككە باسقان مۆھۈردا.

 

ئۇيقۇ، چۈش خىيانەت قىلدى بۇ كېچە،

ئىشىكنى تەمتىرەپ چەكتى سېغىنىش.

يازايمەن تۈنلىرىم تاڭغا چۆككىچە،

ئاق كۆڭۈل بېغىمغا چېكىپ گۈل - نەقىش.

 

گۈل چىراي، گۈلدەك ساراي

 

لېۋىڭ رايىغا كۆڭۈل سۇندى خەت،

تەنھا قونۇشقا بەرگىن ئىجازەت.

شەيتان دامىغا سالاي مەن پېچەت،

ناۋا، سەن ئۈچۈن چەككەن رىيازەت.

 

پەيمان شەرتىدىن سالاي گۈلساراي،

چانغاي پەرىمۇ بېھىشتىن بەلكىم.

پەقەت مەن راۋا تاللىساڭ مالاي،

سۆيگۈ ۋەسلىگە ماكاندۇر قەلبىم.

 

كۈلكەڭ جۇلاسى قېنىمغا قاراپ،

ساۋابىغا جان سوۋغات، گۈلچىراي.

خۇما كۆزلىرىڭ قويسا بىر قاراپ،

بۇ سىناققا مەن قانچە دەم چىداي.

 

گۈلدەك چىرايغا گۈلدەك ساراينى،

ئاتاش بەختىدىن بولاي بەھرىمەن.

قوش يۈرەك سەيلە قىلايلى ئاينى،

تەقدىر - پېشانەڭ ھەمراھ مەن بىلەن.

 

(ئاپتور: قەشقەر «يېڭى يۇلتۇز» يەرلىك سودا چەكلىك شىركىتىدە)