باش بەت>شېئىر

چوغنامە

يوللانغان ۋاقىت:2016-06-29 19:10:00 مەنبە:«قەشقەر» ژۇرنىلى مۇھەررىر:زۇلخۇمار تۇردى

 


 

قۇربان ئابلىمىت

 

1

 

ئۆتسەم ماڭغان كوچاڭدىن ئىپار-ئەنبەر پۇرايدۇ،

سېنى ئويچان كۆزلىرىم كۆرۈنگەندىن سورايدۇ.

كۆيۈۋاتقان سېغىنىش گۈلخان بولدى بىلمىدىڭ،

سۆيگۈڭ مېنى ئامرىقىم قاچانغىچە سىنايدۇ؟

چىن ۋاپادار يار تۇرسام ھىجران ئوتى تۈنلەردە،

مېھرى ۋاپا ئەھلىنى يەنە نېمە قىينايدۇ؟

تۇغۇلىدۇ باھارمۇ ئاشىقلارنىڭ كۆزىدىن،

تەشۋىشلەنمە بېغىڭنى گۈل-غۇنچىلار ئورايدۇ.

ئېچىلىپتۇ لېۋىڭدە تەبەسسۇمۇڭ چېچەكلەپ،

كېپىنەك بوپ لەۋلىرىم ئۇنى قاچان شورايدۇ؟

 

2

 

سۈبھى ئوغلى تۇغۇلغاندا ئۇپۇق مەڭزىدە قان پەيدا،

ھاياتلىق كۈيىگە تەشنا يېڭى يولدا نىشان پەيدا.

ئەگەر كۈي چەشمىسى ئاقسا ئۇچارلىقلار تىلىدىن بىر،

باياۋاندا تېنەپ يۈرگەن مادارسىز تەندە جان پەيدا.

پەسىللەر تاشلىسا گاھى پەلەك دەرگاھىغا قاسراق،

كۆزۈم ئېكرانىدا شۇدەم كۈلۈپ رەڭدار جاھان پەيدا.

قىسىپ ئۈمىد چېچەكىنى ھايات قاينامىدا ئۈزسەڭ،

ئىزىڭغا باش ئۇرۇپ ئۇپقۇن چوقۇم ئالدىڭدا شان پەيدا.

ئەقىدە باغلىرى قۇربان غۇرۇردىن سۇ ئىچىپ قانسا،

سۆيۈپ مەڭزىڭگە ئاي يۈزلۈك ئۆمۈرلۈك مېھرىبان پەيدا.

 

3

 

گۈل ھىدلىق تىنىقلىرىڭ كېلەر سەلكىن شامال ئارا،

كۈلىسەن قەلبىم بېغىدا سۆزلىرىڭ سوئال ئارا.

ئەسلىمەم ئەينىكىنى چەككەندە ئوتلۇق كۆزلىرىڭ،

كۆزلىرىمگە نۇر ياغار ئوماق زىناقىڭ خال ئارا.

كېچىدە تەنھالىقىم ھىجران ئازابى بەرسىمۇ،

قايغۇ كۈيى لەۋلىرىمگە بال سۇنار ۋىسال ئارا.

يەلپۈنەر قۇندۇز چېچىڭ تۆكۈپ تۈنلەرگە ھەيرانلىق،

كۈتۈشتە ئاي ماكان قىلغان يېگانە مەجنۇنتال ئارا.

 

4

 

ئۈندى سېمايىڭ ئاھ، قاچان ئوتلۇق كۆزۈم تۇپراقىدا،

پارلىدى شۇندىن بۇيان شەبنەم يۈرەك ياپراقىدا.

كۆزۈڭ دولقۇنلىغان چەكسىز غۇبارسىز سۆيگۈ ئوكيانى،

ئاڭا چۈشمەككە ئىمكان يوق تۈمەن لەشكەر قىرغاقىدا.

چۈشۈمگە گەر كىرىپ قالساڭ يۈرەككە تىغ ئۇرار ھىجران،

بەختتىن شاد كۈلەر تۇيغۇم بىھوشلانسام قۇچاقىڭدا.

لېۋىڭدىن چوغ سورار بەلكىم سەھەر  پەيتىدە ئوت شارى،

ئاشۇ ئوت شارىدەك مەنمۇ كۆيۈپ ياندىم پىراقىڭدا.

نازاكەت كۆكلىمىڭ ئىچرە دىلىم باغىنى گۈل قىلغىن،

ھاياتىم گۈللىسۇن مەڭگۈ سېنىڭ سۆيگۈ بۇلاقىڭدا.

 

5

 

باھار گۈلشەنلىرى كۈلگەي بۇلبۇلدىن ناۋا كەلسە،

دىماقلار مەست بولۇر گۈللەر زىناقىدىن ھاۋا كەلسە.

شىۋىرلاپ كۈي تۆكەر ياپراق چىمەنلەرنىڭ قۇلاقىغا،

كۈلەر كۈللى تەبىئەتمۇ پەلەكتىن شوخ سابا كەلسە.

ۋىسالغا تەلمۈرۈپ يىغلاپ بۇلۇتلار ياش تۆكەر يۇم-يۇم،

قۇياش، ئاي لېۋىدىن ھەر دەم ئۇچۇپ ئاتەش سادا كەلسە.

ھاياجان تىترىكى ئىچرە كۆيەر يۇلتۇزلار ئارماندا،

ئىشىق ئىلكىدە ئاشىقنىڭ كۆزىدىن ئوت - لاۋا كەلسە.

ئۆتەر ئۆمرۈم مۇھەببەتلىك ۋىسال-قۇت تەختىدە مەڭگۈ،

ۋاپادار گۈل نىگارىمدىن يۈرەكىمگە داۋا كەلسە.

 

6

 

ئەقىل رومكاڭ توشار ھەيھات، چىنار قەددىڭ پۈكۈلگەندە،

مۇھەببەت ئەۋجىگە يەتكەي ئۇنىڭ قەدرى ئۆتۈلگەندە.

كۈلەر ئۆمرۈڭ بېغى ياشناپ شەپەقتىن رەڭ تالاشقاندەك،

پېشانەڭدىن سۈزۈك يامغۇر گويا سەلدەك تۆكۈلگەندە.

قىلار مەستخۇش سېنى ئالەم گۈزەللەر كۆكسىدەك تىترەپ،

ئۆلۈم جامى ئارا جانغا تېمىم شەربەت يۈتۈلگەندە.

مۇھەببەت ناخشىسى ئېيتار ھاياتلىق كۈيلىرىڭ ھەر دەم،

بىھاجەت ياش تۆكۈپ يىغلاش ئىشق ئەھلى ئۆكۈنگەندە.

 

7

 

كەل دىلبىرىم يۈرەكىمنى سېنىڭ ئۈچۈن جەننەت ئېتەي،

ئۇنىڭ بىھوش كۈيلىرىگە سېنى بىر دەم ئۈلپەت ئېتەي.

يانار دىلدا گۈزەل ئارمان مۇھەببەتتە مېنى تاۋلاپ،

ئاتەش ھىجران قۇچاقىدا كۆيۈشنى بىر پۇرسەت ئېتەي.

تولار سۆيگۈ شارابىغا ئەقىدە جاملىرى دەردلىك،

ئىچىپ ئۇندىن تېمىم شەربەت ھاياتىمغا رىغبەت ئېتەي.

كۈتەر كۆڭلۈم-دىلىم ھەر چاغ، سېنىڭدىن زەررىچە ئىنئام،

ۋىسال جامى تۇتار بولساڭ ئۇنى مەڭگۈ ھۆرمەت ئېتەي.

 

8

 

سېھىرلىنەر پۈتۈن ئالەم گۈزەل سەۋرى سىياقىڭدا،

قۇياش ئۇخلاپ ياتار مەستخۇش يۈزۈڭ بەرگى- زىناقىڭدا.

بۇلۇتلار تارقىلىپ كۆكتىن چىمەنلەرمۇ بولۇر نىمجان،

جاھان كۆكسىگە ئوق ئاتقان جادۇ كىرپىك قىياقىڭدا.

كۆتۈرسە بىھېساب دولقۇن كۆزۈڭ ئوكيانىدا ئەكسىم،

نۇرى چاقنايدۇ بەختىمنىڭ كۈلۈپ تۇرغان قاراقىڭدا.

چاڭقىسا ياشلىق چۆلىدە ئارزۇ-ئۈمىدنىڭ يىلتىزى،

ھاياتلىق كەۋسىرى ئىچكەي سېنىڭ سۆيگۈ بۇلاقىڭدا.

سەمەندەرلەرگە ئايلاندى ئىشىق گۈلخانىدا قۇربان،

ئەگەر سەكراتتىمۇ كۈلگەي ئۆلەر بولسا قۇچاقىڭدا.

 

9

 

جۇنۇن سەھراسىدا بىلسەڭ نىگار باشقا، پەرى باشقا،

پاكلىق كۆكىدە نۇر چاچقان ھاياتلىق ئەختىرى باشقا.

ئىچىپ قانساممۇ ھەتتاكى ھىلالنىڭ كۆزىدىن شەبنەم،

يۈتمەس پەقەت چاڭقاقلىقىم ۋىسالنىڭ كەۋسىرى باشقا.

قۇياش سۇ بولغۇدەك ئۇچقۇن كۆزۈمدە تۇرسىمۇ پارلاپ،

يۈرەك- باغرىمنى ئېرىتكەن قارا كۆزنىڭ نۇرى باشقا.

سۈزۈپ چىقسام تۈمەن مىسرا ئىلھام دېڭىزىدىن ھەردەم،

سۆيگۈ - ۋاپانى كۈيلىگەن نەزمەمنىڭ ھەر قۇرى باشقا.

 

10

 

قاچانكى دىل ھىماتىڭ گۈل دىلىڭدا بەلكى كۆكلەم بار،

لېۋىڭدىن گۈل سۈيى ئىچتىم لېۋىڭدە بەلكى زەمزەم بار.

ئاي ئېرىپ ھىجران تۈنى كۆزۈڭگە چۆكتى بىر يۇلتۇز،

يۈزۈڭ بەرگى زىناقىڭ نەم كۆزۈڭدە بەلكى شەبنەم بار.

ئۇياتچان ئوت خىيالىڭ ھەم پىنھانە مەكتۇبىڭ ئىچرە،

ھېسلىرىم چاڭقاقلىقىغا سۆزۈڭدە بەلكى مەلھەم بار.

ئەقىدە كەۋسىرى تولغان ھاياتلىقىم ئېقىنى سەن،

كۈتۈشتىن يالتايسا گەر كۆڭلۈم ئىزىڭدا بەلكى قەبرەم بار.

 

(ئاپتور: يېڭىشەھەر ناھىيە يامانيار يېزىلىق ئوتتۇرا مەكتەپتە)